Image Courtesy- Hub News
পাতনি
ব্লু ভেলী ক্লাষ্টাৰ(Blue Valley Cluster) হৈছে অসমৰ গুৱাহাটীত অসম চৰকাৰৰ দ্বাৰা আনুষ্ঠানিকভাৱে উদ্বোধন কৰা এক আন্তঃমহাদেশীয় জৈৱ-শিল্প উদ্যোগ(Bio-Industrial), যাৰ লক্ষ্য হৈছে উত্তৰ-পূব ভাৰতৰ সমৃদ্ধ জীৱ-বৈচিত্ৰ্যক ইউৰোপ আৰু বিশ্ববজাৰৰ সৈতে সংযোগ স্থাপন কৰা। এই উদ্যোগে চৰকাৰ-ব্যক্তিগত খণ্ড-জনসাধাৰণ-পৰিৱেশ (4P: Public-Private-People-Planet) অংশীদাৰিত্বৰ জৰিয়তে ফ্লেভাৰ, ফ্ৰেগ্ৰেন্স, আয়ুষ (AYUSH), চাহ আৰু খাদ্য প্ৰক্ৰিয়াকৰণ খণ্ডত এক বহনক্ষম উন্নয়নক উৎসাহিত কৰিব।
দৃষ্টিভংগী: ব্লু ভেলী ক্লাষ্টাৰ কি?
ইউৰোপীয় ইউনিয়ন-ভাৰত শীৰ্ষ সন্মিলনত স্থাপিত বহল ব্লু ভেলীছ ইনিচিয়েটিভৰ পৰা উদ্ভৱ হোৱা এই পাইলট প্ৰকল্পটোৱে ৰাজহুৱা-ব্যক্তিগত-জনসংযোগ আৰ্হিত কাম কৰে। ইয়াৰ সামগ্ৰিক লক্ষ্য হৈছে ভৌগোলিকভাৱে বিচ্ছিন্ন বজাৰৰ পৰা অসমক ইউৰোপৰ বাবে এক প্ৰধান বহনক্ষম জৈৱ অৰ্থনীতিৰ কেন্দ্ৰলৈ ৰূপান্তৰ কৰা।
ইয়াৰ মূল উদ্দেশ্যসমূহঃ
১. বজাৰ সংযোগ (Market Access)ঃ স্থানীয় কৃষক, আত্ম-সহায়ক গোট (SHGs), ষ্টাৰ্টআপ আৰু ক্ষুদ্ৰ, লঘু আৰু মধ্যম উদ্যোগসমূহক (MSMEs) পোনপটীয়াকৈ ইউৰোপীয় বজাৰৰ সৈতে সংযোগ স্থাপন কৰা।
২. জৈৱ-অৰ্থনীতিৰ বিকাশ (Bio-Economy Development)ঃ উত্তৰ-পূব ভাৰতত পোৱা ৭,৫০০ৰো অধিক ঔষধি আৰু সুগন্ধি উদ্ভিদ প্ৰজাতিক ভিত্তি কৰি ৰপ্তানিযোগ্য মানদণ্ডৰ জৈৱ-অৰ্থনৈতিক পৰিৱেশ গঢ়ি তোলা।
৩. বহনক্ষম উৎপাদন ব্যৱস্থা (Sustainable Manufacturing)ঃ কৃত্ৰিম বুদ্ধিমত্তা (AI), নেন’প্ৰযুক্তি (Nanotechnology) আৰু চক্ৰীয় জৈৱ-অৰ্থনীতি (Circular Bio-Economy) ব্যৱহাৰ কৰি অপচয় হ্ৰাস কৰা আৰু স্থানীয় জৈৱ সম্পদৰ মূল্য সংযোজন কৰা।
প্ৰধান কৌশলগত খণ্ডসমূহঃ
প্ৰকল্পটোৰ পাইলট পৰ্যায় আৰু পৰৱৰ্তী সম্প্ৰসাৰণমূলক কাৰ্যসূচীসমূহ মূলতঃ তলৰ খণ্ডসমূহৰ ওপৰত কেন্দ্ৰীভূত—
১.ফ্লেভাৰ আৰু ফ্ৰেগ্ৰেন্স (Flavours & Fragrances)- অঞ্চলটোৰ উদ্ভিদভিত্তিক সম্পদ, জৈৱিক কৃষিজ উৎপাদন আৰু অত্যাৱশ্যকীয় তেল (Essential Oils)-ৰ বাণিজ্যিক সম্ভাৱনাক বিকশিত কৰা।
২.আয়ুষ আৰু সুস্থতা (AYUSH & Wellness)- পাৰম্পৰিক ঔষধি আৰু ভেষজ সামগ্ৰীৰ মানদণ্ড নিৰ্ধাৰণ, প্ৰামাণীকৰণ আৰু বিশ্ববজাৰৰ কঠোৰ নিয়ম-নীতি অনুসৰি অনুমোদন নিশ্চিত কৰা।
৩.খাদ্য প্ৰক্ৰিয়াকৰণ (Food Processing)- চাহ, মছলা, জৈৱিক খাদ্য আদি সামগ্ৰীৰ ক্ষেত্ৰত কৃষিজ অপচয় হ্ৰাস কৰি দক্ষ, স্বচ্ছ আৰু অনুসৰণযোগ্য (Traceable) যোগান শৃংখল গঢ়ি তোলা।
কিহৰ বাবে ই গুৰুত্বপূৰ্ণঃ
১.অভূতপূৰ্ব বজাৰ প্ৰৱেশঃ ই অসম আৰু ইউৰোপীয় উদ্যোগসমূহৰ মাজত প্ৰত্যক্ষ B2B আৰু B2G (Business to Government) সম্পৰ্কৰ পথ প্ৰশস্ত কৰে, আন্তঃৰাষ্ট্ৰীয় বাণিজ্যৰ পথ মুকলি কৰে।
২.তৃণমূল পৰ্যায়ৰ সবলীকৰণ: পৰীক্ষণ, প্ৰমাণীকৰণ আৰু প্ৰযুক্তি হস্তান্তৰ সুশৃংখলিত কৰি ক্লাষ্টাৰে মহিলা নেতৃত্বাধীন আত্মসহায়ক গোট (এছ এইচ জি) আৰু স্থানীয় কৃষকসকলক উচ্চ মূল্যৰ বিশ্বব্যাপী যোগান শৃংখলত অংশগ্ৰহণ কৰিবলৈ সক্ষম কৰে।
৩.প্ৰতিষ্ঠানিক সমৰ্থনঃ অসম ঔদ্যোগিক উন্নয়ন নিগম লিমিটেড (এআইডিচি) আৰু ফেডাৰেচন অৱ ইউৰোপিয়ান বিজনেছ ইন ইণ্ডিয়াই (এফইবিআই) বুজাবুজি চুক্তিৰ জৰিয়তে সহযোগিতা কৰি মহাদেশ অতিক্ৰম কৰা বিনিয়োগ, জ্ঞান বিনিময়, আৰু সহজ বিনিয়োগকাৰীৰ অনুমোদনৰ সুবিধা প্ৰদান কৰিছে।
গাঁথনি আৰু প্ৰশাসন ব্যৱস্থাঃ
এই উদ্যোগৰ মুখ্য কাৰ্যালয় অৱস্থিত ব্ৰাছেলছ(Brussels)ত। সমগ্ৰ প্ৰকল্পৰ কৰ্মচক্ৰ পৰিচালনা কৰে INLAMOBI-এ। অসমত ইয়াৰ অধীনত গুৱাহাটীত এক অনুষ্ঠান ব্যৱস্থাপনা কাৰ্যালয়(Programme Management Office) চমূকৈ PMO স্থাপন কৰা হৈছে আৰু ভৱিষ্যতে এক দক্ষতা বিশ্ববিদ্যালয় (Skill University) স্থাপনৰ প্ৰস্তাৱ ৰখা হৈছে।
এই ক্লাষ্টাৰে উত্তৰ-পূব ভাৰত, ভূটান আৰু ইউৰোপৰ মাজত এক সেতুবন্ধন হিচাপে কাম কৰিব।
ইয়াৰ কৌশলগত গুৰুত্বঃ
অসমৰ মুখ্যমন্ত্ৰী ড০ হিমন্ত বিশ্ব শৰ্মা আৰু ইউৰোপীয় সংঘ (EU)-ৰ উচ্চপদস্থ প্ৰতিনিধিদলৰ উপস্থিতিত এই উদ্যোগৰ শুভাৰম্ভ কৰা হয়। ব্লু ভেলী ক্লাষ্টাৰে ইউৰোপীয় সংঘ আৰু ভাৰতৰ মাজৰ বৃহত্তৰ কৌশলগত সহযোগিতাক স্থানীয় অৰ্থনৈতিক সুযোগলৈ ৰূপান্তৰিত কৰাৰ এক বাস্তৱ পদক্ষেপ। উত্তৰ-পূব ভাৰতৰ বাবে এই উদ্যোগে কেৱল কেঁচা সম্পদ আহৰণৰ পৰম্পৰাগত ধাৰণাৰ পৰা ওলাই আহি গৱেষণা-ভিত্তিক, উচ্চ মূল্য সংযোজিত উদ্যোগায়নৰ পথ মুকলি কৰিব। ইয়াৰ ফলত দীৰ্ঘম্যাদী কৰ্মসংস্থান সৃষ্টি, ৰপ্তানি বৃদ্ধি আৰু আঞ্চলিক অৰ্থনীতিৰ শক্তিশালী বিকাশ সম্ভৱ হ’ব।
উপসংহাৰঃ
এই প্ৰকল্পটো সফল হ’বলৈ হ’লে শক্তিশালী আন্তঃগাঁথনি নিৰ্মাণৰ ওপৰত গুৰুত্ব দিব লাগিব। ইয়াৰ ভিতৰত এমএছএমইসমূহক সাধাৰণ প্ৰক্ৰিয়াকৰণৰ সুবিধা, অনুসৰণ সমৰ্থন, আৰু ইউৰোপীয় বজাৰসমূহে ইক’-টেক্সটাইল আৰু প্ৰাকৃতিক সামগ্ৰীৰ বাবে প্ৰয়োজনীয় সঠিক প্ৰমাণপত্ৰ প্ৰদান কৰাটো অন্তৰ্ভুক্ত হৈছে। এই প্ৰকল্পৰ সফলতাই নিসন্দেহ অসম আৰু উত্তৰ পূৰ্বাঞ্চলত ইউৰোপৰ বজাৰত নিজৰ স্থিত শক্তিশালী কৰাক সহায় কৰিব।
যদি আপুনি সন্দেহজনক অনুভৱ কৰা যিকোনো তথ্য, ৰেকৰ্ডিং, ফটো, ভিডিঅ’ লাভ কৰে,সেইবোৰ আমাৰ হোৱাটছএপ নম্বৰলৈ ফৰৱাৰ্ড কৰিব পাৰে (+91 904 905 3770)। আমি তথ্যগত বিৱৰণসহ অনুসন্ধান কৰিম আৰু প্ৰকাশ কৰিম। আমাৰ দৈনিক আপডেটবোৰো চাবস্ক্ৰাইব কৰক।
যদি আপুনি সামাজিক মাধ্যমত আমাক অনুসৰণ কৰিব বিচাৰে:
ফেচবুক | টুইটাৰ | ইনষ্টাগ্ৰাম | গুগল নিউজ চেনেল | হোৱাটছএপ
Title: ব্লু ভেলী ক্লাষ্টাৰ(Blue Valley Cluster) কি, কিয়, কেনেকৈ? এক চমূ আলোচনা।
Fact Check By: Pranjal Sharma
Result: Insight
