এই ভিডিঅ'টোত ভেকচিন গ্ৰহণ কৰি থকা ছোৱালীজনী ৰাছিয়াৰ ৰাষ্ট্ৰপতি পুটিনৰ কন্যা নহয়!

ফেচবুক লিংক | সংৰক্ষিত লিংক

শেহতীয়াকৈ সমগ্ৰ বিশ্বতে ক’ৰনা ভাইৰাছ ৰোগে ত্ৰাসৰ সৃষ্টি কৰি থকাৰ সময়তে ৰাছিয়াত বিশ্বৰ প্ৰথমটো ক’ৰনা ভাইৰাছৰ ভেকচিন মানৱ দেহত প্ৰয়োগৰ বাবে সাজু হৈ উঠিছে বুলি এক বাতৰি ভাইৰেল হৈ পৰিছে । ৰাছিয়াৰ ৰাষ্ট্ৰপতি ভ্লাডিমিৰ পুটিনে ৰাছিয়াই বিশ্বৰ প্ৰথমটো ক’ৰনা প্ৰতিৰোধী ভেকচিন প্ৰস্তুত কৰি উলিয়াইছে বুলি ইতিমধ্যে আনুষ্ঠানিকভাৱে ঘোষণা কৰিছে । পুটিনৰ নিজৰ কন্যাই এই ভেকচিন গ্ৰহণ কৰিছে বুলিও পুটিনে জানিবলৈ দিছে ।

এনে সময়তে ফেচবুকত এক বিশেষ ভিডিঅ' ভাইৰেল হৈ পৰিছে । দাবী কৰা হৈছে যে এইটো ৰাছিয়াৰ ৰাষ্ট্ৰপতি পুটিনৰ কন্যাই ভেকচিন গ্ৰহণ কৰি থকা সময়ৰ ভিডিঅ' হয় । অসমতো উক্ত ভিডিঅ'টো প্ৰাগ নিউজ নামৰ এটা ফেচবুক পে'জৰ পৰা এক ভিডিঅ' বাতৰিৰ অংশ হিচাবে আপলোড কৰা হৈছে (ভিডিঅ'টোৰ ১:৪০ মিনিটত) য'ত দাবী কৰা হৈছে যে ভিডিঅ'টোত ভেকচিন গ্ৰহণ কৰি থকা ছোৱালীজনী ৰাছিয়াৰ ৰাষ্ট্ৰপতি পুটিনৰ কন্যা হয় । উক্ত ফেচবুক পোষ্টটো ১৩ আগষ্ট, ২০২০ তাৰিখে আপলোড কৰা হৈছে আৰু প্ৰায় ১০ হেজাৰ বাৰ দৰ্শন কৰা হৈছে ।

সঁচাকৈ এইটো ৰাছিয়াৰ ৰাষ্ট্ৰপতি পুটিনৰ কন্যাই ভেকচিন গ্ৰহণ কৰি থকা সময়ৰ ভিডিঅ' হয় নেকি? সঁচাকৈ ভিডিঅ'টোত সেইয়া পুটিনৰ কন্যা নেকি? সত্য কি? জানো আহক ।

প্ৰণালী

আমি প্ৰথমে বিশেষ ছফ্টৱেৰৰ সহায়ত ভাইৰেল ভিডিঅ’টো কীফ্ৰেমছত বিভক্ত কৰিলোঁ আৰু গুগলত ৰিভাৰ্ছ ইমেজ চাৰ্ছ কৰিলোঁ । আমি ভিডিঅ’টো ৰাছিয়াৰ 'আৰ টি' নামৰ এক টিভি চেনেলৰ ৱেবছাইটত ২০ জুলাই, ২০২০ তাৰিখে প্ৰকাশিত এক ৰিপৰ্টত সন্নিৱিষ্ট থকা দেখিলোঁ । উক্ত ৰিপৰ্টটোত উল্লেখ আছে যে ক’ৰনা ভাইৰাছৰ ভেকচিনৰ ক্লিনিকেল ট্ৰায়েলত ভাগ লোৱা কিছু স্বেচ্ছাসেৱকক মস্কোত থকা এখন মিলিটেৰী হস্পিটেলৰ পৰা অব্যাহতি দিয়া হৈছে । ৰিপৰ্টটোত লগতে উল্লেখ আছে যে এই স্বেচ্ছাসেৱক সকল মিলিটেৰী আৰু সাধাৰণ নাগৰিকৰ মাজৰ পৰা নিৰ্বাচিত কৰা হৈছিল । উক্ত ৰিপৰ্টটোত ক'তো উল্লেখ নাই যে ভিডিঅ'টোত দেখা পোৱা স্বেচ্ছাসেৱক ছোৱালী গৰাকী পুটিনৰ কন্যা হয় ।

ইয়াৰ পাছত আমি ৰাছিয়ান চাৰ্ছ ইঞ্জিন Yandexত ৰিভাৰ্ছ ইমেজ চাৰ্ছ কৰিলোঁ আৰু ইউটিউবত উক্ত স্বেচ্ছাসেৱক গৰাকীক তেওঁৰ অভিজ্ঞতাৰ সম্পৰ্কে বৰ্ণনা দি থকা দেখিলোঁ । উক্ত ভিডিঅ'টো জুন ২৬, ২০২০ তাৰিখে আপলোড কৰা হৈছিল । ভিডিঅ'টোৰ কেপছনত উক্ত স্বেচ্ছাসেৱক গৰাকীৰ নাম নাতালিয়া বুলিও উল্লেখ আছে । আমি নিশ্চিত হ'লো যে উক্ত ছোৱালীজনী ৰাষ্ট্ৰপতি পুটিনৰ কন্যা নহয় ।

ফলাফল

ভিডিঅ'টোত ভেকচিন গ্ৰহণ কৰি থকা ছোৱালীজনী ৰাছিয়াৰ ৰাষ্ট্ৰপতি পুটিনৰ কন্যা নহয় বৰঞ্চ নাতালিয়া নামৰ এক স্বেচ্ছাসেৱক হয় । গতিকে উক্ত ভিডিঅ'টো ৰাছিয়াৰ ৰাষ্ট্ৰপতি পুটিনৰ কন্যাই ভেকচিন গ্ৰহণ কৰি থকা সময়ৰ নহয় । উক্ত ফেচবুক পোষ্টটো আংশিকভাৱে ভুৱা হয় ।