শেহতীয়াকৈ অসমত ফেচবুকৰ জৰিয়তে এখন বিশেষ ফটো ভাইৰেল হৈ পৰিছে । ফটোখনত এখন চাহ বাগানৰ মাজত এটুকুৰা মনমোহা মুকলি ঠাই দেখা গৈছে আৰু নাতি দূৰত এখন পাহাৰ দেখা গৈছে । দাবী কৰা হৈছে যে এই ফটোখন বোকাখাটৰ কাজিৰঙা অভয়াৰণ্যত থকা এখন চাহ বাগিছাৰ হয় ।
‘আছামিজ অনলাইন’ নামৰ এক ফেচবুক পেজৰ পৰা উক্ত ভাইৰেল ফটোখন ১১ আগষ্ট, ২০২০ তাৰিখে আপলোড কৰা হৈছে । উক্ত পোষ্টটো, “#PhotoCourtesyJun
বোকাখাটৰ কাজিৰঙা অভয়াৰণ্যত থকা
চাহ বাগিছাৰ এই মনোৰম দৃশ্যৰে আজি
#সুপ্ৰভাত_অসম” বুলি শিৰোনামা দি আপলোড কৰা হৈছে আৰু উক্ত পোষ্টটো ভাইৰেল হৈ পৰিছে ।
বিভিন্নজনে উক্ত পোষ্টটোত কমেণ্ট কৰি এই বিষয়ে কিছু সন্দেহ প্ৰকাশ কৰা দেখা গৈছে । গতিকে আমি উক্ত ফেচবুক পোষ্টটোৰ সত্যতা নিৰূপণ কৰিবলৈ সিদ্ধান্ত ললো । সঁচাকৈ এই ভাইৰেল ফটোখন বোকাখাটৰ কাজিৰঙা অভয়াৰণ্যত থকা এখন চাহ বাগিছাৰ হয় নেকি? সত্য কি? জানো আহক ।
প্ৰণালী
আমি উক্ত ভাইৰেল পোষ্টটোৰ কমেণ্টছ চেকচনত থকা কিছুমান কমেণ্টছৰ ওপৰত ভিত্তি কৰি কিছু বিশেষ কীৱৰ্ডছ ব্যৱহাৰ কৰি গুগল চাৰ্চ কৰিলোঁ । আমি দেখিলোঁ যে উক্ত ভাইৰেল ফটোখনত দেখা ঠাইখনৰ এক ভিডিঅ‘ ইউটিউবত আপলোড কৰা আছে । উক্ত ইউটিউব ভিডিঅ’টোৰ বিৱৰণত স্পষ্টকৈ লিখা আছে যে এই ঠাইখন অসমৰ ওদালগুৰি জিলাত অৱস্থিত “ক’ৰাম’ৰ নামৰ চাহ বাগান তথা হেলিপেড” হয় ।
আমি এই বিষয়ে আৰু চাৰ্চ কৰাত গুগলত এই ঠাইখনৰ বিষয়ে বিতংকৈ তথ্য থকা দেখিবলৈ পালোঁ । জানিবলৈ ইয়াত ক্লিক কৰক ।
বোকাখাট আৰু ওদালগুৰিৰ দূৰত্ব প্ৰায় ১৭০ কিলোমটাৰ মান হয় । গতিকে উক্ত ভাইৰেল ফটোখন বোকাখাটৰ কাজিৰঙা অভয়াৰণ্যত থকা এখন চাহ বাগিছাৰ হবই নোৱাৰে ।
ফলাফল
উক্ত ভাইৰেল ফটোখন ওদালগুৰি জিলাৰ এখন চাহ বাগিচাৰ হয় আৰু বোকাখাটৰ কাজিৰঙা অভয়াৰণ্যত থকা এখন চাহ বাগিছাৰ নহয় । গতিকে উক্ত ফেচবুক পোষ্টটো ভুৱা হয় ।
Title:এই ভাইৰেল ফটোখন বোকাখাটৰ কাজিৰঙা অভয়াৰণ্যত থকা এখন চাহ বাগিছাৰ নহয়!
Fact Check By: Manjori BorkotokyResult: False
