এইটো শেহতীয়াকৈ চীনত ক’ৰনা ভাইৰাছে বিধ্বংসী ৰূপ লোৱাৰ পাছত গাহৰি নিধন প্ৰক্ৰিয়াৰ ভিডিঅ’ নহয়!

ফেচবুক পোষ্ট | সংৰক্ষিত পোষ্ট

চীন দেশৰ ৱুহান নামৰ ঠাইখনৰ পৰা সংক্ৰমিত হোৱা ক’ৰনা ভাইৰাছ ৰোগে সম্প্ৰতি সমগ্ৰ দেশখনকে ছানি ধৰিছে আৰু ধীৰে ধীৰে এই ৰোগ বিশ্বৰ বিভিন্ন দেশলৈ বিয়পি পৰিছে । চীন দেশত ইতিমধ্যে জৰুৰী কালিন অৱস্থা ঘোষনা কৰা হৈছে । এই বীজাণুৰ আক্ৰমণত ৰোগত ভুগি চীনত পাঁচশজনতকৈ অধিকৰ মৃত্যু হৈছে আৰু লাখতকৈ অধিক মানুহ আক্ৰান্ত হৈ আছে । এই সময়তে ছচিয়েল মিডিয়াত ৱুহান ক’ৰনা ভাইৰাছৰ বিষয়ে না না উৰা বাতৰি বিয়পিব ধৰিছে । 

ছচিয়েল মিডিয়াত ভাইৰেল হোৱা এটা ভিডিঅ’ত হাজাৰ হাজাৰ গাহৰি জীয়াই জীয়াই জ্বলাই মৰা দেখা গৈছে । উক্ত ভিডিঅ’টোৰ প্ৰথম অংশত হাজাৰ হাজাৰ গাহৰি ট্ৰাকত কোনো স্থানলৈ লৈ যোৱা দেখা গৈছে । ইয়াৰ পাছত এখন বহল পথাৰত খন্দা বৃহৎ গাঁতত গাহৰিবোৰ জীয়াই জীয়াই জ্বলাই মৰা দেখা গৈছে আৰু শেষত মাটি ঢালি পুতি দিয়া দেখা গৈছে । 

দাবী কৰা হৈছে যে এইটো চীনত ক’ৰনা ভাইৰাছে বিধ্বংসী ৰূপ লোৱাৰ পাছত গাহৰিৰ নিধন প্ৰক্ৰিয়াৰ ভিডিঅ’ । 

এনে এক ফেচবুক পোষ্ট অসম২৪এইছ নামৰ পেজৰ পৰা যোৱা ৫ ফেব্ৰুৱাৰী, ২০২০ তাৰিখে আপলোড কৰা হৈছে । উক্ত পোষ্টটো কেইবাবাৰো বিভিন্নজনে শ্বেয়াৰ কৰিছে ফলত চীনত ক’ৰনা ভাইৰাছে বিধ্বংসী ৰূপ লোৱাৰ বাবে গাহৰিবোৰ জীয়াই জীয়াই জ্বলাই মাৰিছে বুলি অসমত ভাইৰেল হৈ পৰিছে । 

সঁচাকৈ এনে হৈছে নেকি? উক্ত পোষ্টটোৰ সত্যতা কিমান? জানোঁ আহক । 

প্ৰণালী

প্ৰথমতে আমি বিশেষ ছফ্টৱেৰৰ সহায়ত উক্ত ভিডিঅ’টো কীফ্ৰেমছত বিভক্ত কৰিলোঁ আৰু গুগলত ৰিভাৰ্ছ ইমেজ চাৰ্ছ কৰিলোঁ । আমি কাইণ্ডাৰৱৰ্ল্ড নামৰ এক ৱেবচাইটত এই সম্পৰ্কে প্ৰকাশিত এক ৰিপৰ্ট দেখা পালোঁ । উক্ত ৰিপৰ্টটোত স্পষ্টকৈ লিখা আছে যে এই ভিডিঅ’টো ডিচেম্বৰ ২০১৮ চনৰে হয় আৰু আফ্ৰিকান স্বোৱাইন ফিভাৰ ৰোগত এই গাহৰিবোৰ আক্ৰান্ত হৈ পৰাত চীনত এনেদৰে নিধন কৰা হৈছিল । 

আমি এই সম্পৰ্কে আৰু জানিবলৈ বিশেষ কিছুমান কীৱৰ্ডছ ব্যৱহাৰ কৰি গুগলত চাৰ্ছ কৰিলোঁ আৰু আফ্ৰিকান স্বোৱাইন ফিভাৰৰ বিষয়ে প্ৰকাশ পোৱা বিভিন্ন লিখনি দেখিলোঁ  । আন্তৰাষ্ট্ৰীয় বাতৰি কাকত, দা গাৰ্ডিয়েনত এই বিষয়ে প্ৰকাশিত এক বাতৰি দেখা পালোঁ । নিউজ ৰিপৰ্টটোত লিখিছে যে ২০১৮ চনৰ পৰাই চীন আৰু পৃথিৱীৰ আন বহু দেশত আফ্ৰিকান স্বোৱাইন ফিভাৰে আতংকৰ সৃষ্টি কৰিছে । এই ৰোগটো মানুহলৈ সংক্ৰমণ  নহয় কিন্তু পোহনীয়া গাহৰিৰ মাজত আতংকৰ সৃষ্টি কৰে । অকল চীনতেই বহু লাখ লাখ গাহৰি ২০১৮ চনতে নিধন কৰিবলগীয়া হৈছিল । এই সম্পৰ্কে বিতংকৈ জানিবলৈ ইয়াত পঢ়ক । 

ফলাফল

এইটো শেহতীয়াকৈ চীনত ক’ৰনা ভাইৰাছে বিধ্বংসী ৰূপ লোৱাৰ পাছত গাহৰি নিধন প্ৰক্ৰিয়াৰ ভিডিঅ’ নহয় বৰঞ্চ এইটো আফ্ৰিকান স্বোৱাইন ফিভাৰত আক্ৰান্ত হোৱাৰ বাবে চীনত ২০১৮ চনতে গাহৰি নিধন কৰাৰ ভিডিঅ’ । উক্ত ভিডিঅ’টোৰ ক’ৰনা ভাইৰাছৰ লগত কোনো সম্পৰ্ক নাই ।