প্ৰাক্তন প্ৰধান মন্ত্ৰী ইন্দিৰা গান্ধীয়ে ভাষণ দি থকা এই ফটোখন ‘গলৱান’ত তোলা নহয়!

ফেচবুক লিংক । সংৰক্ষিত লিংক

শেহতীয়াকৈ লাডাখৰ গলৱান উপত্যকাত চীনা আৰু ভাৰতীয় সৈন্যৰ মাজত হোৱা সংঘৰ্ষত ভাৰতৰ ২০ গৰাকী সেনা জোৱানৰ মৃত্যু হৈছে । দুয়োখন দেশৰ মাজত পৰিস্থিতি যথেষ্ট উত্তেজনা পূৰ্ণ হৈ আছে । এই ক্ষেত্ৰত ভাৰতৰ প্ৰধান মন্ত্ৰী নৰেন্দ্ৰ মোদী বহুত সমালোচনাৰ সম্মুখীন হবলগীয়া হৈছে, বিশেষকৈ বিৰোধী দল কংগ্ৰেছে লাধাখৰ পৰিস্থিতিৰ বাবে মোডীক জগৰীয়া কৰি বিভিন্ন ধৰণে সমালোচনা কৰিছে । 

এনে সময়তে এখন বিশেষ ফটো ফেচবুকত ভাইৰেল হৈ পৰিছে । ফটোখনত প্ৰাক্তন কংগ্ৰেছ নেতা আৰু ভাৰতৰ প্ৰধান মন্ত্ৰী ইন্দিৰা গান্ধীক কিছু সৈন্যৰ আগত ভাষণ দি থকা দেখা গৈছে । দাবী কৰা হৈছে যে এই ভাষণ ইন্দিৰা গান্ধীয়ে শেহতীয়াকৈ ভাৰত-চীন সংঘৰ্ষৰ সময়ত চৰ্চালৈ অহা ‘গলৱান’ নামৰ ঠাই টুকুৰাত দিছিল । বিভিন্নজনে আৰু দাবী কৰিছে যে মোদীয়ে ‘গলৱান’ক চীনৰ হাতত এৰি দিলে কিন্তু ইন্দিৰা গান্ধী প্ৰধান মন্ত্ৰী হৈ থকাৰ সময়ত তেওঁ তাত ভাষণ দিছিল । 

সংৰক্ষিত লিংক

শেহতীয়াকৈ অসমত হোৱাটচ এপ্পৰ যোগেদিও এই বিশেষ ফটোখন ভাইৰেল হৈ পৰিছে ।

সঁচাকৈ ভাইৰেল ফটোখন ‘গলৱান’ৰ নেকি? তেতিয়াৰ প্ৰধান মন্ত্ৰী ইন্দিৰা গান্ধীয়ে ‘গলৱান’ত ভাষণ দিছিল নেকি? সত্য কি? জানোঁ আহক । 

প্ৰণালী

প্ৰথমে আমি বিশেষ ফটোখন গুগলত ৰিভাৰ্ছ ইমেজ চাৰ্ছ কৰিলোঁ আৰু art-sheep.com নামৰ এক ৱেবচাইটত উক্ত ভাইৰেল ফটোখন ইন্দিৰা গান্ধীৰ বিষয়ে এক লিখনিত সন্নিবিষ্ট থকা দেখিলোঁ । ফটোখনৰ কেপচনত লিখা আছে যে উক্ত ফটোখন ইন্দিৰা গান্ধীয়ে ‘লেহ’ত ১৯৭১ চনত জোৱান সকলক উদ্দেশ্যি ভাষণ দি থকাৰ সময়ত তোলা । 

আমি এই বিষয়ে কীৱৰ্ডছ ব্যৱহাৰ কৰি অনলাইন চাৰ্ছ কৰিলোঁ আৰু ‘পিটিআই’ৰ আৰ্কাইভ চেক্সনত উক্ত ফটোখন পালোঁ । তেওঁলোকৰ মতেও উক্ত ফটোখন ১৯৭১ চনত লেহত তোলা । 

‘লেহ’ ঠাইখন ‘গলৱান’ৰ পৰা কমেও দুশ কিলোমিটাৰ দূৰত্বত অৱস্থিত আৰু লেহত ভাষণ দিলে সেইয়া গলৱান বুলি কোৱাৰ কোনো ভিত্তি নাই । 

ফলাফল

উক্ত ভাইৰেল ফটোখন ‘গলৱান’ত তোলা নহয় বৰঞ্চ ‘লেহ’ত তোলা হয় । প্ৰাক্তন প্ৰধান মন্ত্ৰী ইন্দিৰা গান্ধীয়ে ‘গলৱান’ত ভাষণ দিয়া নাছিল ।