চীন দেশৰ ৱুহান নামৰ ঠাইখনৰ পৰা সংক্ৰমিত হোৱা ক’ৰনা ভাইৰাছ ৰোগত ভুগি সমগ্ৰ বিশ্বতে এতিয়ালৈকে প্ৰায় চাৰি লাখতকৈ অধিক মানুহৰ মৃত্যু হৈছে আৰু প্রায় ৭২.৭ লাখ মানুহ আক্রান্ত হৈছে । বিশ্বৰ আন দেশৰ লগতে ভাৰতত এতিয়ালৈকে ২ লাখ ৯৮ হেজাৰতকৈ অধিক ৰোগী চিনাক্ত হৈছে আৰু ৮ হাজাৰতকৈ অধিক লোকৰ মৃত্যু হৈছে । অসমতো তিনিহেজাৰতকৈ অধিক ৰোগী ইতিমধ্যে চিনাক্ত হৈছে আৰু ইয়াৰে আঠজনৰ মৃত্যু হৈছে ।
এনে সময়তে ক’ৰনা ভাইৰাছ সম্বন্ধীয় বিভিন্ন ফটো/ভিডিঅ’/পোষ্ট ছচিয়েল মিডিয়াৰ জৰিয়তে ভাইৰেল হৈ পৰিছে । ইয়াৰে বহুতো ভুৱা বুলি জানিব পৰা গৈছে । ক’ৰনা ভাইৰাছ ৰোগৰ চিকিৎসা সমন্ধে বিভিন্ন পোষ্ট ভাইৰেল হোৱা দেখা গৈছে । শেহতীয়াকৈ অসমত হোৱাটচ এপ্পৰ যোগেদি এখন বিশেষ ফটো ভাইৰেল হৈছে ।
উক্ত ফটোখনত দিল্লীৰ গংগাৰাম হস্পিটেলত কৰ্মৰত এজন ছিনিয়ৰ ডাক্তৰ, ৰাজ কমল আগৰৱালৰ হস্তাক্ষৰ আৰু ছীল-মোহৰ থকা এখন প্ৰেছক্ৰিপচন দেখা গৈছে । প্ৰেছক্ৰিপচন খনত ক’ৰনা ৰোগীৰ বাবে হোম আইছ’লেচনৰ পৰামৰ্শ আৰু লগতে হাইড্ৰ’ক্সিক্লৰ’কুইন, ক্ৰচিন আৰু চেত্ৰিজিন, আদি দৰৱ খাবলৈ কোৱা হৈছে ।
সঁচাকৈ দিল্লীৰ গংগাৰাম হস্পিটেলত কৰ্মৰত এজন ছিনিয়ৰ ডাক্তৰে উক্ত প্ৰেছক্ৰিপচনখন লিখিছিল নেকি? সত্য কি? জানোঁ আহক ।
প্ৰণালী
আমি কিছুমান সাধাৰণ কীৱৰ্ডছ ব্যৱহাৰ কৰি গুগল চাৰ্ছ কৰিলোঁ আৰু এই বিষয়ে গংগাৰাম হস্পিটেলৰ অফিচিয়েল টুইটাৰ হেণ্ডেলৰ পৰা এক স্পষ্টীকৰণ দিয়া দেখিলোঁ । টুইটটোত স্পষ্টকৈ লিখা আছে যে উক্ত প্ৰেছক্ৰিপচনখন ভুৱা হয় আৰু ডাক্তৰজনৰ চহীটোও ভুৱা হয় ।
ইয়াৰ উপৰিয়ো আমি লক্ষ্য কৰিলোঁ যে ডাক্তৰে প্ৰকৃত প্ৰেছক্ৰিপচনত কেতিয়াও ভাইৰেল ফটোখনত লিখাৰ দৰে ‘To whom it may concern’ বুলি নিলিখে আৰু সাধাৰণতে কোনো ব্যক্তিক সম্বোধন কৰিহে লিখে ।
ফলাফল
উক্ত ভাইৰেল প্ৰেছক্ৰিপচনখন ভুৱা হয় আৰু গংগাৰাম হস্পিটেলত কৰ্মৰত এজন ছিনিয়ৰ ডাক্তৰে এই প্ৰেছক্ৰিপচনখন লিখা নাই । এই ভুৱা প্ৰেছক্ৰিপচনখন ভাইৰেল কৰি জনসাধাৰণক বিপথে পৰিচালিত কৰা হৈছে ।
Title:এইখন দিল্লীৰ গংগাৰাম হস্পিটেলৰ ডাক্তৰে লিখা প্ৰেছক্ৰিপচন নহয়!
Fact Check By: Manjori BorkotokyResult: False
