শেহতীয়াকৈ এখন বিশেষ ফটো ছচিয়েল মিডিয়াত ভাইৰেল হৈ পৰিছে । উক্ত ফটোখনত দেশৰ জাতীয় পতাকাখন দেখা গৈছে । দাবী কৰা হৈছে যে স্বাধীনতা দিৱস উপলক্ষে জম্মু কাশ্মীৰৰ লাল চৌকত দেশৰ জাতীয় পতাকা উত্তোলন কৰা হৈছে আৰু এইখন তাৰেই ছবি । উক্ত ফটোখন বিভিন্নজনে ফেচবুকত আপলোড কৰিছে আৰু শ্বেয়াৰ কৰি ভাইৰেল কৰি তুলিছে । দাবী কৰা হৈছে যে বিজেপি চৰকাৰ অহা পাছত আৰু সংবিধানৰ ৩৭০ অনুচ্ছেদ খাৰিজ কৰাৰ পাছত এই পৰিবৰ্তন আহিছে ।
অসমতো উক্ত ফটোখন “স্থান একেই জম্মু-কাশ্মীৰৰ লাল চৌক আৰু লাডাখ কিন্তু ছবি আৰু পৰিৱেশৰ পৰিৱৰ্তন, জয় হিন্দ”, বুলি শিৰোনামা দি ৰবি শংকৰ শৰ্মা নামৰ এক ফেচবুক প্ৰফাইলৰ পৰা আগষ্ট ১৬, ২০২০ তাৰিখে আপলোড কৰা হৈছে । উক্ত পোষ্টটোত বিভিন্নজনে কমেণ্ট কৰিছে তথা পোষ্টটো বহু বাৰ শ্বেয়াৰ কৰা হৈছে ।
ঠিক সেইদৰে অৰ্চন শৰ্মা নামৰ এক ফেচবুক প্ৰফাইলৰ পৰা উক্ত ফটোখন জম্মু-কাশ্মীৰৰ লাল চৌকৰ দৃশ্য আপলোড কৰা হৈছে ।
সঁচাকৈ স্বাধীনতা দিৱস উপলক্ষে জম্মু কাশ্মীৰৰ লাল চৌকত জাতীয় পতাকা উত্তোলন কৰা হৈছিল নেকি? এই ভাইৰেল ফটোখন সঁচা নে? সত্য কি? জানো আহক ।
প্ৰণালী
প্ৰথমে আমি উক্ত ভাইৰেল ফটোখন গুগলত ৰিভাৰ্চ ইমেজ চাৰ্চ কৰিলোঁ আৰু উক্ত ফটোখন ২০১০ চনতে এক ব্লগ পোষ্টত আপলোড হোৱা দেখিলোঁ । উক্ত ফটোখনৰ কেপচনত স্পষ্টকৈ লিখা আছে যে জুন ২২, ২০১০ চনত তোলা এই ফটোখন কাশ্মীৰৰ লাল চৌকৰ হয় ।
আমি দুয়োখন ফটো তুলনা কৰি চালোঁ আৰু দেখিলোঁ যে জাতীয় পতাকা থকা ভাইৰেল ফটোখন আচলতে ২০১০ চনৰ ফটোখন এডিট কৰি বনোৱা হৈছে । জাতীয় পতাকাখন এডিট কৰি যোগ কৰি দিয়া হৈছে ।
আমি ইয়াৰ উপৰিও কিছুমান কীৱৰ্ডছ ব্যৱহাৰ কৰি ফেচবুকত চাৰ্চ কৰিলোঁ আৰু শেহতীয়াকৈ দেশবাসীয়ে উদযাপন কৰা ৭৪তম স্বাধীনতা দিৱসৰ দিনা কাশ্মীৰৰ লাল চৌকৰ কেইখনমান প্ৰকৃত ছবি আপলোড কৰা দেখিলোঁ । উক্ত ফটোবোৰত স্পষ্ট হৈ পৰিছে যে লাল চৌকত কোনো জাতীয় পতাকা উত্তোলন কৰা হোৱা নাই ।
ফলাফল
উক্ত ভাইৰেল ফটোখন ভুৱা হয় । স্বাধীনতা দিৱস উপলক্ষে জম্মু কাশ্মীৰৰ লাল চৌকত জাতীয় পতাকা উত্তোলন কৰা হোৱা নাছিল ।
Title:স্বাধীনতা দিৱস উপলক্ষে জম্মু কাশ্মীৰৰ লাল চৌকত জাতীয় পতাকা উত্তোলন কৰা নাছিল!
Fact Check By: Manjori BorkotokyResult: False
