চিপিআই(এম) নেতা সীতাৰাম য়েচুৰীয়ে ভাৰতীয় সৈন্যৰ বিৰুদ্ধে আৰু চীনৰ সমৰ্থনত শ্লোগান থকা বেনাৰ লৈ প্ৰতিবাদ কৰিছিল নেকি?

সংৰক্ষিত লিংক

শেহতীয়াকৈ লাডাখৰ গলৱান উপত্যকাত চীনা আৰু ভাৰতীয় সৈন্যৰ মাজত হোৱা সংঘৰ্ষত ভাৰতৰ প্ৰায় ২০ গৰাকী সেনা জোৱানৰ মৃত্যু হৈছে । দুয়োখন দেশৰ মাজত পৰিস্থিতি যথেষ্ট উত্তেজনা পূৰ্ণ হৈ আছে আৰু ভাৰতত চীনৰ বিৰুদ্ধে এক জনজাগৰণ সৃষ্টি হোৱা দেখা গৈছে । এনে সময়তে এখন বিশেষ ফটো ছচিয়েল মিডিয়াত ভাইৰেল হৈ পৰিছে । ফটোখনত চিপিআই(এম) নেতা, ‘সীতাৰাম য়েচুৰী’ক হাতত এখন বেনাৰ লৈ থিয় হৈ থকা দেখা গৈছে । বেনাৰখনত ভাৰতীয় সৈন্যৰ বিৰুদ্ধে আৰু চীনৰ সমৰ্থনত শ্লোগান দেখা গৈছে । 

উক্ত ফটোখন ছচিয়েল মিডিয়াত ভাইৰেল হৈ পৰিছে আৰু অসমতো হোৱাটচ এপ্পৰ যোগেদি এই বিশেষ ফটোখন বহুল ভাৱে প্ৰচাৰ হৈছে । 

সঁচাকৈ চিপিআই(এম) নেতা, ‘সীতাৰাম য়েচুৰী’য়ে ভাৰতীয় সৈন্যৰ বিৰুদ্ধে আৰু চীনৰ সমৰ্থনত শ্লোগান থকা বেনাৰ লৈ থিয় হৈছিল নেকি? সত্য কি? জানোঁ আহক । 

প্ৰণালী

আমি প্ৰথমে উক্ত ভাইৰেল ফটোখন গুগলত ৰিভাৰ্ছ ইমেজ চাৰ্ছ কৰিলোঁ আৰু চিপিআই(এম)ৰ ভেৰিফাইড টুইটাৰ হেণ্ডেলৰ পৰা এই বিশেষ ফটোখন আন ফটোৰ সৈতে ১৬ জুন, ২০২০ তাৰিখে আপলোড কৰা হৈছিল । টুইটটোত মোদী চৰকাৰৰ বিভিন্ন নীতিৰ বিৰুদ্ধে এই প্ৰতিবাদ কৰা বুলি উল্লেখ কৰা হৈছে । আমি টুইটটোত সন্নিবিষ্ট য়েচুৰী’ৰ ফটোখন ভালকৈ লক্ষ্য কৰিলোঁ আৰু দেখিলোঁ যে এই ফটোখন আৰু ভাইৰেল হোৱা ফটোখন একেই যদিয়ো কিছু পাৰ্থক্য আছে ।

অফিচিয়েল টুইটাৰ হেণ্ডেলৰ পৰা টুইট কৰা ফটোখনত বেনাৰখনত, “আয়-কৰ ব্ৰেকেটৰ বাহিৰত থকা লোক সকলক অতি শীগ্ৰে তিনিমাহৰ বাবে ৭৫০০ টকা দিয়াৰ ব্যৱস্থা কৰক” বুলি লিখা আছে । ভাইৰেল ফটোখনত দেখা শ্লোগানবোৰ যে এডিট কৰি বনোৱা হৈছিল, সেইয়া স্পষ্ট হৈ পৰিছে । 

এই ফটোখন আমি চিপিআই(এম)ৰ ভেৰিফাইড ফেচবুক পে’জৰ পৰাও ১৬ জুন, ২০২০ তাৰিখে আপলোড হোৱা দেখিলোঁ । উক্ত প্ৰতিবাদৰ এক ফেচবুক লাইভও আমি পে’জটোত দেখিলোঁ য’ত প্ৰকৃত বেনাৰ-পোষ্টাৰবোৰ দেখা পোৱা গৈছে । 

ফলাফল

উক্ত ভাইৰেল ফটোখন ভুৱা হয় আৰু এডিট কৰি বিকৃত কৰা হৈছে । চিপিআই(এম) নেতা সীতাৰাম য়েচুৰীয়ে ভাৰতীয় সৈন্যৰ বিৰুদ্ধে আৰু চীনৰ সমৰ্থনত শ্লোগান থকা বেনাৰ লৈ প্ৰতিবাদ কৰা নাছিল ।