পুৰণি ভিডিঅ’ এটা শেহতীয়াকৈ ছিক্কিমৰ ভাৰত-চীন সীমান্তত দুই দেশৰ জোৱানৰ মাজত হোৱা সংঘৰ্ষৰ ভিডিঅ’ বুলি প্ৰচাৰ কৰা হৈছে!

সংৰক্ষিত লিংক

সম্প্ৰতি ছচিয়েল মিডিয়াৰ জৰিয়তে এক বিশেষ ভিডিঅ’ ভাইৰেল হৈ পৰিছে য’ত আমি কিছু সৈন্য বাহিনীৰ লোকক বাক বিতণ্ডাত লিপ্ত হোৱা দেখিছোঁ । দাবী কৰা হৈছে যে এইটো শেহতীয়াকৈ ছিক্কিমৰ ভাৰত-চীন সীমান্তত দুই দেশৰ জোৱানৰ মাজত হোৱা সংঘৰ্ষৰ ভিডিঅ’ হয় । 

উক্ত ভিডিঅ’টো বৰপিপাল মিউজিক নামৰ এটা ফেচবুক পে’জৰ পৰা ১০ মে’, ২০২০ তাৰিখে আপলোড কৰা হৈছিল আৰু ভিডিঅ’টো এতিয়ালৈকে ১.৩ হাজাৰবাৰ শ্বেয়াৰ কৰা হৈছে আৰু ৬২ হাজাৰবাৰ দৰ্শন কৰা হৈছে । অসমটো এই পোষ্টটোৰ ফেচবুক লিংক হোৱাটচ এপ্পত বহুল ভাৱে শ্বেয়াৰ হৈছে । 

ফেচবুক লিংক । সংৰক্ষিত লিংক

উল্লেখযোগ্য যে শেহতীয়াকৈ ছিক্কিমৰ ভাৰত-চীন সীমান্তত উত্তেজনাৰ সৃষ্টি আৰু দুই দেশৰ জোৱান সংঘৰ্ষত লিপ্ত হোৱাৰ বাতৰি বিভিন্ন সংবাদ মাধ্যমত প্রকাশিত হৈছিল । কিন্তু এই ঘটনাৰ কোনো ভিডিঅ’ প্ৰকাশিত হোৱা নাছিল । এতিয়া বিভিন্নজনে দাবী কৰিছে যে উক্ত ভাইৰেল ভিডিঅ’টো সেই ঘটনাৰ সময়ত ৰেকৰ্ড কৰা হয় । 

আমি ভাইৰেল পোষ্টটোত কিছু লোকে কমেণ্ট কৰা দেখিলোঁ যে এই ভিডিঅ’টো আচলতে পুৰণি হয় আৰু শেহতীয়া ঘটনাটোৰ লগত কোনো সম্পৰ্ক নাই । সেই বাবে বিষয়টোৰ সত্যতা সম্পর্কে আমি অনুসন্ধান কৰিবলৈ ঠিক কৰিলোঁ । 

প্ৰণালী

প্ৰথমে আমি বিশেষ ছফ্টৱেৰৰ সহায়ত ভিডিঅ’টো কীফ্ৰেমছত বিভক্ত কৰিলোঁ আৰু গুগলত ৰিভাৰ্ছ ইমেজ চাৰ্ছ কৰিলোঁ । ইয়াৰ ফলত আমি জি নিউজৰ অফিচিয়েল ইউটিউব চেনেলৰ পৰা এই ভিডিঅ’টো ২০১৪ চনতে, ২৬ আগষ্টত এক বাতৰিৰ অংশ হিচাবে আপলোড কৰা দেখা পালোঁ । বাতৰিটোৰ শিৰোনামা, “অৰুণাচল প্ৰদেশ: চীনৰ সৈন্যই বৰ্ডাৰ ৱাল ভাঙিবলৈ চেষ্টা কৰিছে” বুলি দিয়া আছে । গতিকে আমি নিশ্চিত হলোঁ যে উক্ত ভাইৰেল ভিডিঅ’টো শেহতীয়াকৈ ছিক্কিমত হোৱা সংঘৰ্ষৰ নহয় । 

ইউটিউব লিংক । সংৰক্ষিত লিংক

আমি এই বিষয়ে কীৱৰ্ডছ ব্যৱহাৰ কৰি গুগল চাৰ্ছ কৰাত হিন্দুস্তান টাইমছ নামৰ বাতৰি কাকতখনৰ ৱেবচাইটত এই সম্পৰ্কে এক বাতৰি ২০১১ চনত প্ৰকাশ হোৱা দেখিলোঁ । উক্ত ঘটনাটো জুলাই ১৩, ২০১১ তাৰিখে অৰুণাচল প্ৰদেশৰ টাৱাং জিলাৰ য়াঙছে চেক্টৰত ঘটিছিল বুলি বাতৰিটোত লিখা আছে । বিতংকৈ জানিবলৈ ইয়াত পঢ়ক । 

ফলাফল

এইটো শেহতীয়াকৈ ছিক্কিমৰ ভাৰত-চীন সীমান্তত দুই দেশৰ জোৱানৰ মাজত হোৱা সংঘৰ্ষৰ ভিডিঅ’ নহয় । ভিডিঅ’টো কমেও পাঁচ বছৰ পুৰণি আৰু কিছু সংবাদ মাধ্যমৰ মতে এইটো ২০১১ চনত অৰুণাচল প্ৰদেশৰ টাৱাং জিলাৰ য়াঙছে চেক্টৰত চীনা সৈন্যয়ে এক বৰ্ডাৰ ৱাল ভাঙিবলৈ চেষ্টা কৰোঁতে ৰেকৰ্ড কৰা ভিডিঅ’ হয় ।